یکشنبه , ۲۸ مرداد ۱۳۹۷
خانه / به شی ئه ده بی کوردی / تۆڵه‌/ نینا که‌ریمی

تۆڵه‌/ نینا که‌ریمی

images

۱٫
خۆم رووت ده‌که‌مه‌وه‌ و دووشه‌که‌ به‌ر ئه‌ده‌مه‌ سه‌ر جه‌سته‌مدا.وه‌کوو هه‌میشه‌ له‌ ده‌سته‌کانمه‌وه‌ ده‌ست ئه‌که‌م به‌ شوشتن.لیفه‌که‌ له‌ سابوون ئه‌ده‌م وتون تون ئه‌یهێنمه‌ سه‌ر گرنگترین شوێنی جه‌سته‌مدا.نێوانی قامکه‌کانم ده‌شۆم و سه‌یری خه‌ته‌کانی نێو مستم ده‌که‌م که‌ دیسان جێگایان گۆڕاوه‌.خه‌ته‌ درێژه‌که‌ پێچراوه‌ته‌ ده‌وری ڕاسته‌که‌دا و وه‌ها تێکه‌ڵی یه‌کتر بووگن که‌ دڵنیام ژنه‌ دۆعا نووسه‌که‌ش ناتوانێ له‌ یه‌کیان بکاته‌وه‌.بۆیه‌ ڕقی لێم هه‌ستاوه‌.ئه‌گینا بۆ دڵنیا چه‌ها ناکات؟! ده‌ڵێ: دڵنیا زۆر ئه‌سیل زاده‌یه‌ و ده‌سته‌کانی هه‌ر ره‌نگێکیش بێت خه‌ته‌ ئه‌ستووره‌کانی ده‌خوێندرێته‌وه‌.دایکم زۆر متمانه‌ی پێیه‌ و ئه‌ویش هیوای زۆری داوه‌تێ:دڵنیا چه‌که‌که‌ دێنێته‌وه‌. خوێنی ئه‌و پیاوه‌ له‌ ده‌ماره‌کانیدایه‌ و ته‌واوی نیشانه‌کانیشی هه‌یه‌ وه‌کوو ئه‌و خاچه‌ شکاوه‌ی‌ له‌ سه‌ر ده‌رکه‌ی حه‌مامه‌که‌ کێشابووی و من نازانم بۆچی به‌ بینینی ده‌ماره‌کانم نیشتنه‌ زیڕه‌ و له‌ ترسا چه‌نده‌ها ساعه‌ت نه‌موێرا له‌ ژووری کتێبه‌که‌ن ده‌ر که‌وم که‌چی ئێستاش له‌ کاتی ڕه‌نگدانه‌وه‌ی ده‌سته‌کانمدا بینینه‌وه‌ی ئه‌و خاچه‌ مووچڕکم پێدا ده‌پێچێ. ده‌ست ده‌خه‌مه‌ تۆی قژه‌کانم و ئه‌یشێوێنم به‌ یه‌کدا. ئاوه‌که‌ پرشه‌ پرش ئه‌داته‌ سه‌ر ڕوومه‌تما .ڕه‌نگه‌که‌ن وه‌کوو دڵۆپه‌ ئاره‌ق‌ له‌ تۆی پێستمه‌وه‌ دێنه‌ ده‌رێ و به‌ ده‌م ئاوه‌که‌وه‌ ده‌ڕۆن.بۆ ده‌سته‌کانم ده‌ڕوانم له‌ ئاکامدا ڕه‌نگی خۆیه‌تی.جگه‌ له‌و تاڵه‌ ڕه‌شه‌ درێژانه‌ی پێچراوه‌ته‌ ده‌وری قامکه‌کانمدا. ئه‌ویش ئه‌ده‌مه‌ ده‌م ئاوه‌که‌وه‌ با بڕوات پێش ئه‌وه‌ی ژنه‌ دۆعا نووسه‌که‌ بیبینێ و به‌ دایکم بڵێت قژی ڕه‌ش نیشانه‌ی ڕۆژ ڕه‌شیه‌ و ئه‌و ڕۆژ ڕه‌شیه‌ی له‌ خه‌ونی مندا دۆزیوه‌ته‌وه‌. ئینجاش پێش ئه‌وه‌ی چاوم به‌ خاچه‌که‌ که‌وێت و ده‌سته‌که‌نم زه‌رد ببنه‌وه‌و له‌ حه‌مام ده‌ر ئه‌که‌وم.
۲٫
ئه‌م ژووره‌ ژوورێکی ته‌ریکه‌.ژووری کتێبه‌کان.ئه‌و کتێبانه‌ی باوام کۆی کردووه‌ته‌وه‌ و به‌ قسه‌ی خه‌ڵکی هه‌بوونیان ده‌سه‌ڵات دێنێ و خوێندنه‌وه‌یان بێ ده‌سه‌ڵاتی. بۆیه‌‌هاتنه‌ نێوی ئه‌م ژووره‌ بۆ که‌سمان نیه‌. به‌ تایبه‌ت بۆ من و دڵنیا. ڕه‌نگه‌ ئه‌گه‌ر بابم بزانێت لای ئه‌م کتێباناشم کردووه‌ته‌وه‌ تا ئه‌و ڕۆژه‌ی له‌ دنیا بێت وه‌کوو هۆی ته‌واوی چاره‌ ڕه‌شیه‌کانی بۆم بڕوانێت.که‌چی من به‌ ئه‌سپاییه‌وه‌ دێم و ده‌رکه‌که‌ دائه‌خه‌م ،خۆم له‌ تۆی کتێبه‌کاندا ئه‌شارمه‌وه‌ و ده‌ست ئه‌که‌م به‌ خوێندن.ته‌نیا که‌سێک که‌ ده‌مبینێت چاوه‌ غه‌زه‌ب گرتووه‌کانی باوامه‌ که‌ به‌ چه‌که‌ دوو لووله‌که‌ی ده‌ستیه‌وه‌ مۆڕه‌م لێ ئه‌کات.با بیکات.هه‌ر که‌ یه‌که‌م لاپه‌ڕه‌م خوێنده‌وه‌ سووری چاوه‌کانی نێو وێنه‌که‌ له‌ باتی خوێن بوون به‌ ڕه‌نگی ماتیک و زانیم ئه‌و وێنه‌یه‌ هه‌ڵمان واسیوه‌ ته‌نیا وێنه‌ی چه‌که‌که‌یه‌ که‌ باوامی‌له‌ پشتی سه‌ر به‌ جێ هێشتووه‌. له‌و په‌ڕی ئه‌و نیگا سووره‌وه‌، جگه‌ له‌ نه‌زانین و شه‌ه‌هوه‌ت هیچ ده‌سه‌ڵاتێک به‌ دی ناکرێ.که‌ وایه‌ خه‌تای پرچه‌ ڕه‌شه‌کان و کتێب خوێندنه‌وه‌کانی من نیه‌ چه‌که‌که‌ بۆ خۆی باوامی‌به‌ جێ هێشتووه‌. گریمان خه‌تای منیش بێت ،لام گرنگ نیه‌ .ئه‌وه‌نده‌ ده‌خوێنمه‌وه‌ هه‌تا له‌ مانای ڕه‌نگه‌کان تێ ئه‌گه‌م . بۆ نموونه‌ دوێنێ زانیم سه‌وزی ده‌سته‌کانی دڵنیا هی چرۆ دان نیه‌ و به‌ هۆی هه‌ڵکێشانی چیمه‌نه‌کانه‌ و بریقه‌ دانه‌وه‌یان به‌ بۆنه‌ی ده‌رهێنانی چاوی پشیله‌کانی نێو کۆڵانه‌. هه‌ر ئه‌و پشیلانه‌ی که‌ من له‌ به‌ریان ناوێرم له‌ ماڵ بڕؤمه‌ ده‌ره‌وه‌.ئه‌وانه‌ی که‌ بریقه‌ی چاوه‌کانیان ده‌خه‌نه‌ نێو بیلبیله‌کانت و سه‌یری نێو ڕۆحت ده‌که‌ن و خه‌ته‌کانی نێو ده‌ستت ئه‌به‌ن بۆ ژنه‌ دۆعا نووسه‌که‌.

۳٫
دوێنێ دایکم دیسان چارشێوه ڕه‌شه‌که‌ی دا به‌ سه‌ریا و ڕۆیشته‌ به‌ر ماڵی ژنه‌ دۆعا نووسه‌که‌.گوتبووی : “منداڵه‌ گه‌وره‌که‌ت ده‌ڕوات و قه‌ت قه‌ت نایبینیته‌وه‌.” دایکم به‌ سه‌ر سوڕمانه‌وه‌ سه‌یری کردبوو له‌ به‌ر ئه‌وه‌ی دوو ڕۆژ پێش ئه‌وه‌ی ڕۆیشتن بکه‌وێته‌ سه‌رم پێ گوتبوو :”له‌ گه‌ڕاندنه‌وه‌ی چه‌که‌که‌دا یارمه‌تی ده‌رتان ده‌بێت.” ژنه‌ نه‌یزانی بوو ‌به‌ ته‌مام ئه‌وه‌ بڵێ تا ڕام بگۆڕم. به‌م هه‌موو بڕیاره‌ جۆراوجۆره‌وه‌ دایکم له‌وانه‌یه‌ بڕوای پێ نه‌مێنێ. ژنه‌ سوێندی خواردبوو ئه‌مه‌ تۆڵه‌ سه‌ندنه‌وه‌ی نووسه‌ری کتێبه‌کانه. ڕاسته‌ که‌ به‌ خوێندنه‌وه‌ی هه‌ر لاپه‌ڕه‌یێک خه‌ته‌کانی نێو ده‌ستم جێ به‌ جێ ده‌بن و بیرێکی نوێ ئه‌که‌وێته‌ مێشکمه‌وه‌.شه‌و که‌ هه‌موویان نووستن خۆم ده‌خه‌مه‌ ئه‌م ژووره‌ و ده‌رکه‌که‌ دائه‌خه‌م و گوێ شل ئه‌که‌م بۆ به‌سه‌ر‌هاتی نووسه‌ری کتێبه‌کان. خۆم ئه‌نێمه‌ جێگای هه‌موویان و موو به‌ موو دێته‌ پێش ‌چاوم که‌ چه‌که‌که‌ چلۆن بێ قه‌رار له‌ ده‌سته‌کانی باوامدا به‌ ته‌مای ته‌واو بوونی کتێبه‌که‌یه‌ و هه‌ر که‌ نووسه‌ر کتێب له‌ ئامێز له‌ ژووره‌که‌ی ده‌رکه‌وتووه‌ مێشکی به‌ر گووله‌ داوه‌ و ڕه‌نگی خوێن و ده‌سته‌کانی ڕژاواته‌ سه‌ر لاپه‌ڕه‌کانی کتێبه‌که‌یدا.ئینجا به‌ تووکه‌ شه‌ق کۆی کردوونه‌وه‌ و له‌ نێو قه‌فه‌سه‌ی کتێب خانه‌که‌ی باوامدا دیلی کردوون.بێ جیاوازی،له‌م کتێب خانه‌دا هه‌موو ڕه‌نگه‌ کتێبێکمان هه‌یه‌ . کتێبی ڕه‌ش،کتێبی سوور،کتێبی شین ،کتێبی سه‌وز.ژنه‌که‌ پێشتر به‌ دایکمی‌گوتبوو تۆڵه‌ی نووسه‌ره‌کان شه‌یدا کردنی نه‌وه‌ی چه‌کداره‌کانه‌.له‌و حاڵه‌ته‌دا چه‌که‌که‌ پشت له‌و بنه‌ماڵه‌ ده‌کات و خۆی ده‌خاته‌ نێو ده‌ستی سمێڵ زلترین چاوسووری شاره‌وه‌.بۆیه‌ دایکم ده‌رگای ئه‌م ژووره‌ی داخستووه‌ و ڕۆژێک دوو دڵۆپ سوورایی ئه‌تکێنێته‌‌ نێو چاوانی دڵنیاوه‌.
۴٫
ئه‌مڕۆ دوایین لاپه‌ڕه‌ی کتێبه‌که‌م ده‌نووسم.هه‌تا ئه‌مڕۆ که‌س نه‌یزانیوه‌خه‌ریکئ نووسینم . ژان مێشکی داگرتووم و ڕه‌نگه‌کان به‌ره‌ به‌ره‌ له‌ سه‌ر قامکه‌کانمه‌وه‌ ده‌ڕژێنه‌ سه‌ر لاپه‌ڕه‌کان.ترس و دڵه‌خورپه‌ دایگرتووم و ناوێرم بزریکێنم. دوایین دڵۆپه‌ ره‌نگه‌کانی تۆی مێشکم به‌ نکه‌ نک خۆیان ئه‌گه‌یێننه‌ سه‌ر قامکه‌کانم. وێنه‌ی کاڵه‌و بووی باوام له‌ پشتی چه‌که‌که‌وه‌ تکاکارانه‌ سه‌یرم ده‌کات،ئاوڕی لێ ناده‌مه‌وه‌ و وشه‌کانی کۆتایی به‌ ده‌گمه‌ن هه‌ڵده‌بژێرم و به‌ سرنج دانه‌وه‌یه‌کی بێ وێنه‌ ده‌یاننووسم.مێشکم له‌ ژاندا خه‌ریکه‌ بته‌قێ.ترس وه‌کوو خوێن به‌ ده‌ماره‌کانمدا ده‌گه‌ڕێت.پێنووسه‌که‌م داده‌نێم و چاو ده‌گێڕمه‌ سه‌ر ته‌واوی کتێبه‌کانی ئه‌م ژووره‌دا،ئینجا هه‌ڵی ئه‌گرمه‌وه‌ به‌ سه‌ختی دوایین وشه‌م ده‌نووسم.ده‌نگی زریکه‌ی دایکم دێت که‌ به‌ر تووکه‌ شه‌قی چه‌کداره‌که‌ که‌وتووه‌.

• خاچی شکاو سه‌مبۆلی ss ه‌ له‌ پێشبینیه‌کانی نۆسترادامووسدا.

دیدگاهتان را بنویسید

نشانی ایمیل شما منتشر نخواهد شد.

یک + ده =

قالب وردپرس پوسته وردپرس ..