جمعه , ۴ خرداد ۱۳۹۷
خانه / به شی ئه ده بی کوردی / شه‌مدانییه‌ خه‌مباره‌کان/ وۆلفگانگ بۆرشێرت، و: ئه‌نوه‌ر عه‌ره‌ب

شه‌مدانییه‌ خه‌مباره‌کان/ وۆلفگانگ بۆرشێرت، و: ئه‌نوه‌ر عه‌ره‌ب

 

hopper_hotel_window

ئه‌و ده‌مه‌ی یه‌کتریان ناسی هه‌وا تاریک بوو. ژنه‌که خوڵكی كرد بچنە ماڵێ. پیاوه‌که‌ قه‌بووڵی کرد. ژنه‌که‌ ناوماڵ، روومیزی، مه‌لافه‌ و ته‌نانه‌ت دەوری و چنگاڵه‌کانیشی پێ نیشان دا. به‌ڵام هەر كە له‌ رووناکایی دا به‌رامبه‌ر یه‌ک دانیشتن پیاوه‌که‌ لەڕێوە چاوی به‌ لووتی ژنه‌ که‌وت.

له‌ دڵی خۆیدا وتی: ده‌ڵێی لووتێکیان به‌ ده‌م و چاوییه‌وه‌ نووساندووە. هیچ كوێی له‌ لووتی که‌س ناچێ. زیاتر شێوەی‌ جۆرێك میوە دەدا. سه‌یره‌! کونه‌ لووته‌کانی هه‌ر لێك‌ ناچن. یه‌کیان زۆر ته‌نگه‌ و وه‌ک به‌یزی وایه‌، ئه‌ویتریشیان وه‌ک زاركی بیرێك که‌ ده‌می‌كرابێتەوە، تاریک و بێ بن.

به‌ ده‌سره‌یه‌ک عاره‌قه‌ی هه‌نیه‌ی سڕی.

ژنه‌که‌ وتی: «پێموا زۆریش گه‌رمه؟»

پیاوه‌که‌ لە لووتی ڕاما و وتی: «ئای، ئه‌رێوه‌ڵڵا». و دیسان ڕۆچووه‌ ناو فکره‌وه‌: ده‌بێ پێوه‌یان نووساندبێ، پینەیەكی ناتەرزە. رەنگیشی له‌ پێستی ناکاڵێته‌وه؛‌ تۆختره‌. كوڕە خۆ کونه‌ لووته‌کانیشی وه‌ک یه‌ک نین، یان ره‌نگه‌ مۆدێکی تازه‌ بێ.

وه‌بیر کاره‌کانی پیکاسۆ که‌وته‌وه‌.

پیاوه‌که‌ وتی: «ئێوه‌ کاره‌کانی پیکاسۆتان به‌ دڵه‌؟»

ژنه‌که‌ وتی: «کێ؟ پی…کا….»

پیاوه‌که‌ بێ ­سێ­ ودوو پرسی: «ته‌سادووفتان کردووه‌؟»

ژنه‌که‌ وتی: «لەبەر چی وا دەڵێی؟»

پیاوه‌که‌ وتی: «وه‌ڵڵا…»

ژنه‌که‌ وتی: «ئه‌ها له‌ به‌ر لووتم ده‌ڵێن؟»

پیاوه‌که‌ دەیویست بڵێ: «تیه‌ح!» به‌ڵام وتی: «كە ئاوا!»

ژنه‌که‌ وتی: «من زۆر گرینگی‌ به‌‌هاوسه‌نگی ده‌ده‌م. چاو له‌و دوو شه‌مدانییه‌ی بەر په‌نجه‌ره‌که‌ بکه‌ن! یه‌کیان لای چه‌په‌ و ئه‌ویتریشتان لای راست.‌هاوسه‌نگ نین؟. بڕوا بکه‌ن ده‌روونی من له‌ چاو رواڵه‌تم شتێكی دیكەیە.» ده‌ستیشی له‌ سه‌ر ئه‌ژنۆی پیاوه‌که‌ دانا. پیاوه‌که‌ له‌ قووڵایی چاوی ژنه‌که‌دا بڵێسەی ئاورێکی بەدی كرد.

ژنه‌که‌ به‌ هێمنی و تۆزێك به‌ شه‌رمه‌وه‌ وتی: «هیچ کێشه‌یه‌کیشم له‌ گه‌ڵ شوو کردن و ژیانی‌هاوبه‌شی نییه‌.»

پیاوه‌که‌ له‌ دمی‌ده‌رپه‌ڕی: «به‌ خاتری‌هاوسه‌نگی؟»

ژنه‌که‌ به‌ دلۆڤانی قسه‌که‌ی بۆ ڕاست کرده‌وه: «هاوئاهه‌نگی… له‌به‌ر‌هاوئاهه‌نگی»

پیاوه‌که‌ش وتی: «به‌ڵێ له‌به‌ر‌هاوئاهه‌نگی» و هه‌ستا سەر پێ.

ژنه‌که‌ وتی: «ده‌تانهه‌وێ بڕۆن؟»

پیاوه‌که‌ وتی: «به‌ڵێ ده‌ڕۆم.»

ژنه‌که‌ تا به‌ر ده‌رگا به‌ڕێی کرد. وتی: «ده‌روونی ئینسانه‌کان گرینگە، نەك رواڵه‌تیان.»

پیاوه‌که‌ش له‌ دڵە خۆیدا وتی: «تۆش به‌و لووته‌ته‌وه‌!» و وتی: «یانی له‌ ده‌رووندا وه‌ک ئه‌و شه‌مدانییانه‌‌هاوسه‌نگی» و له‌ پلیکانه‌کانه‌وه‌ چووه‌ خوارێ.

ژنه‌که‌ لە بەر پەنجەرەكە وێستا و چاوی لە دوو دا؛

دیتی که‌ پیاوه‌که‌ له‌ خوارێ وێستا و به‌ ده‌سره‌که‌ی عاره‌قه‌ی هه‌نیه‌ی سڕی‌. جارێك، دووجار و جارێکیتریش به‌ڵام ته‌وسه‌بزه‌ی رزگار بوونی ئه‌وی نه‌دی. نه‌یدیت؛ چونكە تارمایی فرمێسك وەسەر چاوی كشابوو.

شه‌مدانییه‌کان بۆنی خه‌میان لێ ده‌هات.

————————————————–

وۆلفگانگ بۆرشێرت (Wolfgang Borchert)

وه‌رگێڕانی: ئه‌نوه‌ر عه‌ره‌ب

 

پاسخ دهید

نشانی ایمیل شما منتشر نخواهد شد.

دوازده + شانزده =

قالب وردپرس پوسته وردپرس